बुथ कब्जा गर्न ६ हजार छापामारलाई घर विदा

निर्वाचन नजिकिंदै जांदा माओवादीले शिविरमा रहेका माओवादी लडाकूलाई शान्ति सम्झ्यौता विपरित निर्वाचनमा खटाउन थालेको छ । विद्रोहको धम्की दिंदै बुथ कब्जा गर्न माओवादीले लडाकूलाई निर्वाचनमा संचालन गरेको बताइन्छ । शिविरबाट घर विदामा पठाएर निर्वाचनमा खटाऊंदासमेत राष्ट्रसंघीय हतियार ब्यवस्थापन टोलीले कुनै कारबाहीसमेत अगाडि बढाउन सकेको छैन । जबकि शान्ति सम्झ्यौतामा उल्लेख भएअनुसार शिविरबाट १२ प्रतिशतभन्दा बढी छापामार एकैपटक बाहिरिन पाउने छैनन । माओवादीले सैन्य तालिम लिएकाहरुलाई निर्वाचनमा परिचालन गरेर निर्वाचन परिणाम आफ्नो पोल्टामा पार्ने रणनीति बनाएको छ ।
१८ हजार छापामारमध्ये हरेक शिविरबाट छनोट गरी ६ हजार माओवादी छापामार घर विदामा गइसकेका छन । उनीहरुले वाईसीएलको संयोजनमा कार्यरत रहनुपर्ने गरी शिविर कमाण्डरहरुले निर्देशन दिएको बताइन्छ । एकपटकमा २४ सय छापामारले विदा पाउने नियम भए पनि अब सबैजसो शिविरमा गरी बांकी २४ सय रहेको बताइन्छ । त्यसरी शिविरबाट छापामार बाहिरिंदा सरकार र अनमिन भने मौन रहेको छ । सरकारले पालनपोषण गरेका शिविरमा रहेका माओवादी छापामारलाई माओवादीले आवश्यक पर्दा प्रयोग गर्ने नपर्दा शिविरमा नै पठाउने कार्य पनि आचारसंहिता विपरित हो कि होइन अन्य दलहरुले सोच्नुपर्ने विषय हो ।खोजतलास सम्वाददाता