उपरथी घले विदामा

वैशाख २५  -अन्यथा निर्णय भइआएको अवस्थामा बाहेक' आगामी जेठ ४ गतेबाट अवकाश हुने भनी नेपाली सेनाले उपरथी दमनबहादुर घलेलाई स्मरण पत्र दिएको छ। पत्र पाएलगत्तै बिहीबारदेखि उनी विदा बसेका छन्।

अवकासको दुई साताअघिबाट विदा बस्नुपर्ने प्रचलन छ। उनलाई दिइएको स्मरणपत्रमा उल्लेखित 'अन्यथा निर्णय भइआएको अवस्थामा बाहेक' भन्ने बेहोरा भने यसअघि अरु सैनिक अधिकृतको पत्रमा लेखिने नगरेको जंगी अड्डा स्रोतले जनाएको छ।

प्रधान सेनापति क्षत्रमानसिंह गुरूङले एक साताअघि संसदको राज्य व्यवस्था समितिमा रथी संख्या यथाशीघ्र दुई थपेर चार बनाउनुपर्ने जिकिर गरेका थिए। दुई रथीको दरबन्दी थपिए उपरथी नेत्रबहादुर थापा र घले बढुवा हुन पाउने बुझिएको छ।