प्रधानमन्त्रीद्वारा कमल नेपालीलाई तीन लाख प्रदान

पोखराका साहसी बालक कमल नेपालीलाई प्रधानमन्त्री गिरिजाप्रसाद कोइरालाले आज तीन लाख रुपैयाँ प्रधान गर्नुभएको छ । कमल नेपालीले साठी फिट गहिरो खोँचमा खसेकी बालिकाको उद्धार गरेका थिए । उनले बालिकालाई झोलामा हाली बाहिर निकालेका थिए । पोखरामा जुत्ता सिलाउने व्यवसाय गर्दै आएका उनका बुबाका कमल कान्छो छोरा हुन् ।

बालिकालाई उद्धार गरेपछि उनलाई काठमाडौं ल्याएर सार्वजनिक अभिनन्दन गरेर सहर घुमाइएको थियो । उनलाई थुप्रै संघसंस्था तथा व्यक्तिहरुले आर्थिक सहयोग समेत गरेका छन् । उनको खातामा अहिले लाखौं रुपैयाँ जम्मा भइसकेको छ । उनलाई निशुल्क पढाउन विभिन्न विद्यालयहरुले प्रस्ताव गरेका छन् । सामान्य आर्थिक अवस्था भएका कमलको साहसिक कार्यले उनको परिवारको आर्थिक अवस्था पनि रातारात सम्पन्न भएको छ ।